The Sun Interview 4: Charmaine Sheh suffered poverty in TVB, had to borrow money to pay tax

[The Sun 05/04/2012]



不少藝員入行初期都要捱窮，視后佘詩曼亦不例外，雖然她當年沒有亂揈錢，但生活費、置裝費及租屋樣樣襟計，到月底依然冇錢剩，要厚着面皮問人借錢交稅，幸好她火速走紅，第二年已儲到錢！

出面一直有人話TVB人工低，甚至刻薄藝人，但我冇咁嘅經歷，簽嗰陣已經知價錢，相比起內地或者其他地方算OK，其實呢啲地方都係近年先暴漲，之前都唔係好高！一開始簽TVB，我係自願性簽，條件寫得清清楚楚，養家同生活全部都係TVB畀我，應該要多謝。

如果問我咁多年有冇捱過窮，事實上第一年做嘢，的確要問人借錢交稅，因為啲錢好快使晒。選完港姐嗰陣唔多錢，出席活動又要自己畀錢買衫，當時根本買唔起名牌，得一萬幾千蚊一個月，買一件名牌就食都唔使食！雖然唔使畀家用，只係搞掂自己，我又唔會亂使錢，但唔記得要交稅！當時未有呢個Concept，賺到嘅錢要交稅、養車同買衫，住村屋又要使4、5千蚊！去到第二年先開始每個月儲到錢。

玩股票損手爛腳

講到投資，我唔係好識，試過買股票蝕咗幾十萬！都超過10年前嘅事喇！好心痛呀！之後唔敢再投資，依家理財方法會實際啲，最多買吓基金，因為玩投資實在要太多時間去睇住，我冇時間去睇，寧願腳踏實地工作。