The Sun Interview 1: Charmaine Sheh missed out plenty of chances in love

[The Sun 02.04.2012]

個性率直的無綫視后佘詩曼入行以來緋聞不絕，慘被冠以「姣佘」稱號，阿佘曾為此心情低落，深夜時分亦要打長途電話給母親訴苦，她說：「好多唔係事實都寫！」仍是單身的阿佘坦言曾錯過不少機會，亦不要有錢伴侶，深信月老有朝一日會為她穿針引線安排Mr. Right。阿佘將一連五日跟讀者分享感情、友情、伯樂、入行捱窮及拍電影的心聲。

畀人話係「姣佘」，問我有冇反感？其實開頭係有唔開心，啱啱入行就咁寫，好多唔係事實都寫，有時心諗，我都冇去過嗰度，冇做過，冇講過佢是非，做咩要咁講我啫！不過後來冇理咁多，咁多年嚟佢哋要寫咩我控制唔到，冇人幫到你，寫到佢爛咪唔會再寫囉！嗰幾年媽咪未返番香港住，我半夜收工4點半，返去沖個涼都5、6點，都會打長途電話畀佢傾偈。媽咪叫我唔好理，話唔寫你先驚，自己、媽咪同朋友知你係點咪得囉！使乜理咁多，你見到嗰啲人咩？

「唔係要嫁有錢人」

好多人話我緋聞多多，其實初入行時唔知咩係緋聞，死都講唔係同埋答冇，但係出來效果唔係咁，睇多兩次知道咁講係唔Work，你鍾意寫咩就寫咩啦！畀人話我係「緋聞女王」，乜原來有咁嘅稱號？我冇咩感覺喎！我都唔知有冇因為咁影響男仔追我，啲男仔都唔會同我講，話其實好鍾意你，不過你咁多緋聞就唔追你喇！唔會o架嘛！其實我都想遇到一個同我一樣嘅人，係用對眼去睇，而唔係用隻耳去聽嘅人。

咁多年經歷咗好幾段感情，都唔會Set理想對象係點，其實我要求從來唔係高，唔係要嫁個有錢人，唔係一早嫁咗啦！我要自己好鍾意，甚至我鍾意佢多過佢鍾意我。幾時結婚？都係緣分注定啦！過去嘅經歷令我領會到Timing好緊要，其實即係緣分，你遇到就點都走唔甩，之前就算係仇人都會一齊，但要分開就點挽留都挽留唔到，就算自己事業都唔可以掌握晒，更何況係兩個人嘅事！其實我愛情觀不嬲都隨意，一向都係開心行先！

「做我男友都辛苦」

以前我唔會為愛情放棄事業，但依家會！唔關經歷多咗事，因為每個人唔同階段、年紀需要唔同嘅嘢，當時係搏殺期，搵錢吖嘛！我要有目標，要做得更好，所有感情嚟到都睇唔入眼，幾好條件都唔會放個心入去，可能都會試一試嘅……但其實個心根本唔喺度，就算出十次街都冇用，不過實際上都唔會出到咁多次街啦！以前拍拖真係冇咩做，呢樣係代價，亦係自己選擇，冇得後悔，當時做我男友都辛苦o架！所以咪散囉！冇辦法！都有錯過咗唔少機會o架！（明日待續）

拉扯9年：女孤身．男有家

阿佘入行後緋聞不斷，不過要數最「長情」的，莫過於她與陳浩民的一段情。02年，他們合作電影《情緣汽水機》後被爆過從甚密，兩人皆例牌否認，但同年10月，一段疑似二人情慾對話的錄音曝光，鬧得滿城風雨，緋聞其後「流傳」多年，更一度被指在雲景道築愛巢，但他們堅持只以「好朋友」及「生死交」相稱，但有指阿佘因難忍男友花心，決定揮劍斬情絲。

06年，阿佘在電視節目中承認戀情，並指因傳媒壓力及男方經常不在港而分手。去年男方在內地娶妻生女，正式為彼此的緣分畫上句號。