Breaking News

Wednesday, April 04, 2012

The Sun Interview 3: Charmaine Sheh is successful but not arrogant, sees herself as a newcomer


[The Sun 04/04/2012]



回想多年演藝生涯,佘詩曼有不少人要感激,當中包括無綫高層曾勵珍及伯樂監製戚其義。珍姐的叮囑令她學懂以「新人」狀態不停吸收,而思想古怪的戚其義,則精於發掘演員的特質及陰暗面,讓她展現另一面給觀眾欣賞。

當年讀完書返香港,一直未搵到工,有日媽咪睇電視聽到港姐音樂,就叫我去試。我開頭都接受唔到,如果衰咗咁點?去到後來終於不情不願咁參加,得到季軍嗰吓好似贏咗咁!後來加入TVB拍劇,起初演技畀好多人批評,但我不停鑽研,好開心慢慢獲得認同。

曾勵珍教做戲真諦

高層珍姐(曾勵珍)同樂小姐(樂易玲)不時搵藝人傾偈,畀好多寶貴意見我哋,有次珍姐叫我上房睇片,當時我拍咗4、5年戲啦!佢話:「好叻啦依家!識做戲啦!」我梗係話唔係啦!佢就叮囑我唔好做到滑晒「啞」,即係唔好以為自己好似識做戲,就照住自己方法去演,唔好開心就笑,唔開心就喊,以為咁就成功。

佢話每個演員都有呢個階段,其實演戲係無止境,當時真係諗爆頭o架!由嗰刻開始,我永遠當自己係新人去做,雖然有經驗始終有唔同睇法,但唔好當自己好老練咁去做。

戚其義放大陰暗面

有人話我近年拍劇成熟咗好多,其實係劇種方面幫咗個大忙,監製戚其義對我好大幫助,絕對係我伯樂,佢好識喺演員身上抽取某啲分子出嚟發揮,其實每個人都有好多方面,有少少陰暗面,睇你自己會唔會將佢放大出嚟,佢了解咗你之後,就識將嗰樣嘢發大嚟玩。

我哋合作咗《金枝慾孽》、《火舞黃沙》、《天與地》同《4 in Love》,我哋好鍾意成班出嚟食飯,咩都講,一路睇電視一路食,交流好好,當然傾嘅都離唔開演戲啦!其實佢諗嘢幾怪,林保怡、陳豪同黃德斌都好清楚。


No comments:

Designed By Published.. Blogger Templates